Հունիսի 1-ից ֆրանսիացի հնէաբաններն «Էրեբունի» արգելոց-թանգարանում սկսել են իրենց պեղումները: Նշենք, որ այս պատմահնագիտական թանգարանում ֆրանսիացի մասնագետները մշտապես գումար են տրամադրում` պեղումներ անելու նպատակով: Բազմաթիվ հարցազրույցներում նրանք նշել են, որ «Էրեբունի» արգելոց –թանգարանը, որը հանդիսանում է մ.թ.ա. 8-րդ դարի կենդանի մատյան, չի կարող անտարբեր թողնել և ոչ մի հնէաբանի:
Mardik.am-ը զրուցելով թանգարանի փոխտնօրեն Արաքսի Մեշինյանի հետ, փորձեց պարզել, թե պեղումների ընթացքում ինչ նոր գտածոներ են հայտնաբերվել:
Տիկին Մեշինյանը նշեց, որ պեղումներ են կատարվում Խալդիի տաճարի շրջակա մասում, ուսումնասիրվում է միջանկյալ շերտը, որտեղից հայտնաբերվել են աղյուսե պատեր, դռներ և խեցեղեն:
Պեղումները ֆինանսավորել է ֆրանսիական կողմը, սակայն «Էրեբունի» թանգարանի տնօրինությունն էլ իր ներդրումն ունի` 250 000 դրամ պեղումների համար համապատասխան գործիքներ և այլ պարագաներ ձեռքբերելու նպատակով:
Տիկին Մեշինյանը նշում է, որ Ֆրանսիայի հնագետները մշտապես ցանկանում են համագործակցել հայ հնագետների հետ, այս անգամը ևս բացառություն չէ:
Նշենք, որ այս տարի ֆրանսիացիները շարունակում են կիսատ թողած գործը: Թանգարանի փոխտնօրենը նշում է, որ նախորդ անգամ ֆրանսիացի մասնագետներն ամբողջությամբ չէին ավարտել պեղումները: Այս տարի կնքվել է 4 տարվա համագործակցության պայմանագիր: Տիկին Մեշինյանի հավաստմամբ, եթե Աստծո կամոք այս պայմանագրի շրջանակներում ավարտեն Խալիդիի հարակից տարածքի պեղումները, հաջորդ տարիների ընթացքում հնարավոր կլինի պեղել նաև ամրոցի այլ տարածքներ:
Այս ամիսները «Էրեբունի» արգելոց-թանգարանում զբոսաշրջիկների ամենաեռուն շրջանն է: Թանգարանի փոխտնօրենը նշեց, որ պեղումները բնավ էլ չեն խոչընդոտում զբոսաշրջիկներին ընդունելիս, ընդհակառակը, նրանք ավելի մեծ ոգևորությամբ են այցելում արգելոց-թանգարան` տեսնելու կենդանի պեղումներ:
Պեղումները կավարտվեն հունիսի վերջին: